France Presse-ը, Le Figaro-ն և այլ ֆրանսիական ԶԼՄ–ներ հրաժարվել են լուսաբանել Ֆրանսիայում Ադրբեջանի դեսպանին՝ անհիմն մեղադրանքներ հնչեցնելու համար

Ֆրանսիայում Ադրբեջանի դեսպան Ռահման Մուսթաֆաևը «վիրավորվել է», որ ֆրանսիական պետական France Presse (Agence France Presse – AFP) գործակալությունը հրաժարվել է հրապարակել իր հետ արված ռեպորտաժը: Այս մասին նա գրել է իր թվիթերյան էջում։

«Ամոթ ռեպորտաժս հրապարակելուց հրաժարվող AFP-ին և Դիդիե Լորային։ Ամոթ մեզ խոսքի հնարավորություն չտվող և մեր հոդվածները հրապարակելուց հրաժարվող Le Figaro–ին և այլ ԶԼՄ–ներին։ Ահա, թե ինչպես է աշխատում խոսքի իրավունքը Ֆրանսիայում»,– վրդովված գրել է ադրբեջանցի դիվանագետը։

Մուսթաֆաևը նաև հրապարակել է Լորայի և Օլիվիե անունով լրագրողի էլեկտրոնային նամակը: «Ուսումնասիրելով զրույցի բովանդակությունը՝ որոշել ենք լուր չտալ։ Ձեր հնչեցրած մեղադրանքները չեն հաստատվել»,– նշված է ադրբեջանցի դեսպանին ուղղված նամակում։