Ռուսաստանի ԱԳՆ-ն Թուրքիայի հետ շփումներում բարձրացնում է Ղարաբաղյան մարտերին վարձկանների մասնակցության հարցը

Ռուսաստանը թուրքական կողմի հետ շփումներում բարձրացնում է Լեռնային Ղարաբաղի հակամարտության գոտում Սիրիայից և Լիբիայից վարձկանների հարցը: Այս մասին երկուշաբթի լրագրողներին հայտնել է Մերձավոր Արևելքի և Աֆրիկայի երկրներում Ռուսաստանի Դաշնության նախագահի հատուկ ներկայացուցիչ, փոխարտգործնախարար Միխայիլ Բոգդանովը:

«Մենք քննարկում ենք բոլոր խնդիրները»,- ասել է  նա՝ պատասխանելով համապատասխան հարցին:

Պատասխանելով հարցին՝ արդյո՞ք ռուսական կողմը շփումների ընթացքում նշում է հակամարտության գոտում վարձկանների մասնակցության անընդունելիությունը, փոխնախարարը պատասխանել է. «Իհարկե՛»։

Ավելի վաղ Ռուսաստանի արտգործնախարարությունը խոր մտահոգություն էր հայտնել ապօրինի զինված խմբավորումների զինյալներին Սիրիայից և Լիբիայից Լեռնային Ղարաբաղում ռազմական գործողություններին մասնակցելու համար ուղարկելու մասին տեղեկատվության կապակցությամբ: