Էրդողանը հրամայել է վերանայել կամ չեղարկել Ստամբուլյան կոնվենցիան

Թուրքիայի նախագահ Ռեջեփ Թայիփ Էրդողանն անդրադարձել է երկրում վերջին շրջանում դարձյալ ակտիվացած Ստամբուլյան կոնվենցիայի թեմային։

Թուրքական Hürriyet-ի լրագրող Գիզեմ Քարաքըշի փոխանցմամբ՝ Էրդողանի նախագահությամբ տեղի ունեցած Արդարություն և զարգացում կուսակցության նահանգապետերի մասնակցությամբ նիստի ժամանակ հրահանգվել է վերանայել Ստամբուլյան կոնվենցիան։

«Աշխատեք, աչքի անցկացրեք։ Եթե ժողովուրդը ցանկանում է, չեղարկեք այն։ Եթե ժողովրդի պահանջը այն վերացնելն է, ըստ դրա որոշում կայացրեք։ Ժողովուրդն ինչպես ասի, այդպես էլ կլինի», - հրահանգել էր Էրդողանը։

Հիշեցնենք, որ Թուրքիան Ստամբուլյան կոնվենցիան ստորագրած և վավերացրած երկիրն է։

Եվրոպայի խորհրդի «Կանանց նկատմամբ բռնության և ընտանեկան բռնության կանխարգելման ու դրա դեմ պայքարի մասին կոնվենցիան» ստորագրել են ԵԽ անդամ 46 երկրներ, միայն ՌԴ-ն ու Ադրբեջանը այն չեն ստորագրել։ 33 երկիր վավերացրել է այն։ Մի շարք երկրներում՝ ներառյալ Հայաստանում, կոնվենցիան խիստ քննադատության է ենթարկվում մասնավորապես այնտեղ «գենդերային հավասարության» մասին դրույթների և «երրորդ սեռ» կոչվածի մասին դրույթների պատճառով։