Պոմպեոն Իրանին մեղադրել է համավարակի պայմաններում ահաբեկչությունը բորբոքելու մեջ

ԱՄՆ պետքարտուղար Մայք Պոմպեոն հայտարարել է, որ Իրանը շարունակում է բորբոքել ահաբեկչությունն ամբողջ աշխարհում նույնիսկ կորոնավիրուսի համավարակի պայմաններում։ Նման հայտարարությամբ պետքարտուղարը հանդես է եկել այսօր Երուսաղեմում Իսրայելի վարչապետ Բենյամին Նեթանյահուի հետ հանդիպման ժամանակ. հայտնում է «ՏԱՍՍ» գործակալությունը։

«Նույնիսկ ներկայիս համավարակի պայմաններում Իրանն օգտագործում է իր ռեժիմի ռեսուրսները՝ ահաբեկչությունը բորբոքելու համար։ Եվ դա այն պայմաններում, երբ իրանցի ժողովուրդը մեծ զրկանքներ է կրում», - նշում է Պոմպեոն։

Նեթանյահուն իր հերթին բարձր է գնահատել Պոմպեոյի այցը՝ նշելով, որ համավարակի պայմաններում առաջին այցը կատարվել է Իսրայել, ինչը «իրենց դաշինքի հզորության ցուցիչն է»։