Իրանը ողջունում է տարածաշրջանում լարվածության նվազեցումը. Իրանի ԱԳՆ խոսնակ

Իրանը ողջունում է տարածաշրջանում լարվածության նվազեցումը եւ էսկալացիայի մեծացման նպատակ չի հետապնդում: Այս մասին այսօր լրագրողներին հայտնել է Իրանի ԱԳ նախարարության պաշտոնական ներկայացուցիչ Սեյեդ Աբաս Մուսավին. հաղորդում է ԻՌՆԱ-ն:

Բոլոր նրանց, ովքեր փորձում են նպաստել տարածաշրջանում լարվածության նվազեցմանը, նա խորհուրդ է տվել վերանայել առկա հիմնախնդրի ծագման ակունքները: «Դրանց խորքում ընկած է Իրանի դեմ ԱՄՆ-ի գործադրած տնտեսական պատերազմը եւ այդ երկրի վարած անպատասխանատու քաղաքականությունը»,- ասել է Մուսավին:

Իրանի արտաքին քաղաքական գերատեսչության մամուլի խոսնակը, մեկնաբանելով Բահրեյնում կայանալիք` Մանամեյի կոնֆերանսի անցկացումը, այն որակել է «ամոթալի»: Ըստ նրա՝ խաղաղության դրոշի ներքո Պաղեստինի ժողովրդի իդեալները եւ իրավունքները շրջանցելու պլաններն ի սկզբանե ձախողման են դատապարտված: