Որքան էլ գայթակղիչ լինի, բայց լեզվակռվով չէ, որ կարգավորվելու է ԼՂ հիմնահարցը. Աննա Նաղդալյանը՝ Ալիևին

Հայկական կողմը մտադիր է հետևողականորեն ձեռնարկել բոլոր քայլերը, որպեսզի ապահովվեն ՀՀ քաղաքացու՝ Ադրբեջանում դատապարտված Կարեն Ղազարյանի իրավունքները, ազատությունը և վերադարձը հայրենիք. այսօր ասուլիսի ժամանակ հայտարարեց  ԱԳՆ մամուլի քարտուղար Աննա Նաղդալյանը:

«Քայլեր ձեռնարկվում են, բայց որևէ բան չեմ կարող դեռ հրապարակային ասել, երբ դրանք մտնեն հրապարակման փուլ, տեղյակ կպահենք»,-ընդգծեց նա:

Անդրադառնալով Ադրբեջանի նախագահ Իլհամ Ալիևի հայտարարությանը, որ «հակամարտությունը պետք է կարգավորվի միայն Ադրբեջանի տարածքային ամբողջականության շրջանակում», Աննա Նաղդալյանը շեշտեց. «Որքան էլ գայթակղիչ լինի, բայց լեզվակռվով չէ, որ կարգավորվելու է հիմնահարցը: Մենք դեռևս սպասում ենք համարժեք պատասխանի մեր այն մոտեցմանը, որ հանգուցալուծումը պետք է ընդունելի լինի երեք ժողովուրդների համար»: