Շաքարավազ ներկրողներն ավելացել են. ՊԵԿ նախագահ

Լրագրողների հետ հանդիպման ժամանակ ՊԵԿ նախագահ Դավիթ Անանյանը հավաստիացրեց, որ շաքարավազ ներկրողներն ավելացել են: Նրա խոսքով` չնայած այդ հանգամանքին, շուկայում կա մեկ այլ խնդիր` շուկան և սպառումը մնացել են նույնը:

«Արդյո՞ք ՀՀ շուկան այնքան մեծ է, որ տարիների ընթացքում այդ ոլորտում մենաշնորհ ունեցողը տնտեսական մրցակցության առումով հոժարակամ ուզենա կիսել իր դիրքն այլ տնտեսվարողների հետ: Բնականաբար` ոչ, քանի որ ՀՀ-ում այժմ գործում են տնտեսվարության համահավասար սկզբունքներ: Տեսեք` շուկան նույնն է, սպառումը չի փոխվել, և շուկայում կարող են հայտնվել նոր խաղացողներ: Սակայն մենք մտածում ենք` ինչպիսի պայմաններ ստեղծենք, որ սպառումն ավելանա, որ ներկրվող շաքարն օգտագործվի որպես հումք արտադրության համար, որը կարտահանվի Հայաստանից դուրս»,- ասաց ՊԵԿ նախագահը:

Նա հավելեց, որ ֆորմալ առումով կարող են հայտարարել` մենաշնորհ չկա, բայց տարիներ շարունակ մենաշնորհային դիրք ունենալու հետևանքները դեռևս չենք թոթափել: