Ավտոմեքենաները կմաքսազերծվեն ինվոյսով, որից հետո կստուգվի փաստաթղթերի իսկությունը. ՊԵԿ նախագահ

Այսօր ՊԵԿ նախագահ Դավիթ Անանյանը, լրագրողների հարցին, թե ինչպես է լուծվելու ավտոմեքենաների մաքսազերծման գործում դժգոհությունների հարցը, քանի որ պահանջում են ինվոյսով մասքազերծում, պատասխանեց, որ երեկ հրահանգել է համապատասխան ծառայություններին, որ այսուհետ բոլոր մեքենաները ներմուծվելու են փաստացի ձեռք բերված փաստաթղթերի հիման վրա:

«Պարզապես կուզենայի զգուշացնել, որ մաքսազերծումից հետո հետբացթողումային գործառնությունների շրջանակներում պետք է ճշգրտվեն` արդյո՞ք այդ փաստաթղթերը արժանահավատ են, թե՞ ոչ: Մենք խնդիր չենք հարուցելու, ինվոյսի հիման վրա մաքսային ձևակերպումները իրականացվելու են, հետբացթողումային գործառույթների շրջանակներում էլ փորձելու ենք պարզել այդ ինվոյսային փաստաթղթերի իսկությունը»,- ասաց նա: