Արցախում պայթյունից զոհվածներն ու վիրավորները HALO Trust-ի աշխատակիցներ են

Արցախի Մարտակերտ քաղաքի հարևանությամբ գտնվող չեզոք գոտում ականի պայթյունի հետևանքով զոհվածները HALO Trust միջազգային՝ բրիտանական, հոլանդական կազմակերպության աշխատակիցներ են: Այս մասին Yerkir.am-ի հետ զրույցում հայտնեց Արցախի նախագահի մամուլի խոսնակ Դավիթ Բաբայանը: Նա հաստատեց նաև լուրը, որ կա 3 զոհ, 2 վիրավոր:

«Մեր ականազերծողները պրոֆեսիոնալներ են, անգամ այլ երկրներից գալիս են փորձի փոխանակման համար՝ Աֆղանստանից, Կամբոջայից: HALO Trust-ն Արցախում ականազերծմամբ է զբաղվում վաղուց՝ պատերազմի ավարտից հետո: Նրանք մեծ աշխատանքներ են տարել, մեծ տարածք արդեն իսկ ականազերծել: Ադրբեջանը խոչընդոտում է այդ աշխատանքների ընթացքին, բայց մենք շարունակում ենք դրանք իրականացնել»,- ասաց Բաբայանը:

Հիշեցնենք, որ Ստեփանակերտի հիվանդանոցից Yerkir.am-ի հետ զրույցում հայտնեցին, որ պայթյունի հետևանքով երկու մարդ է տեղափոխվել հիվանդանոց: «Մեկի վիճակը ծանր է, այս պահին վիրահատում են, իսկ մյուսի վիճակը բավարար է»,- ասացին մեզ: