Սաուդյան Արաբիայում հրաժարական տված` Լիբանանի վարչապետը, ի վերջո, վերադարձավ իր երկիր

Սաուդյան Արաբիա այցի ընթացքում անակնկալ հրաժարական տված` Լիբանանի վարչապետ Սաադ Հարիրին 17 օր անց վերադարձել է Լիբանան:

Ըստ Demokrathaber-ի՝ Հարիրիի ժամանման համար Բեյրութի միջազգային օդանավակայանում անվտանգության ծավալուն միջոցառումներ են ձեռնարկվել: Հարիրին Լիբանան վերադառնալուց անմիջապես հետո առաջին հերթին այցելել է հոր՝ Ռաֆիք Հարիրիի շիրիմին, ով 2005-ին սպանվել էր մահափորձի արդյունքում:

Նշենք, որ Լիբանանում կասկածում են, որ Հարիրիի հրաժարականը կապված է Սաուդյան Արաբիայում պատանդառության հետ: Լիբանանի նախագահ Միշել Աունը հայտարարել էր, որ չի ընդունի Հարիրիի հրաժարականը, մինչև նա անձամբ չներկայացնի դրա պատճառը:

Հավելենք նաև, որ Հարիրիի անակնկալ հրաժարականը Լիբանանում ճգնաժամի պատճառ է դարձել: