Երեխայի բախտը բերել է՝ սենյակը հեռու է եղել, բայց ամբողջ ընտանիքը թունավորվել է. 6 անձ տեղափոխվել է հիվանդանոց

Տեղեկացրել էինք, որ երեկ Թալինում խոհանոցի գազի խողովակից արտահոսք է տեղի ունեցել, ինչի հետևանքով տան անդամները՝ 7 հոգի, թունավորվել են: Տուժածներին տեղափոխել են Թալինի հիվանդանոց:

Դաշտադեմի գյուղապետ Անդրանիկ Ավետիսյանը Yerkir.am-ի հետ զրույցում հայտնեց, որ թունավորվել են ընտանիքի 6՝ չափահաս անդամները, իսկ երեխային ոչինչ չի պատահել, քանի որ նա եղել է իր սենյակում, որտեղ գազը չի հասել:

«Վեցից երեքին երեկ հետազոտել, բուժօգնություն են ցուցաբերել ու դուրս գրել հիվանդանոցից, իսկ մյուս երեքը դեռ հիվանդանոցում են: Նրանց վիճակը լավ է, բայց կաթիլային են ստանում, որպեսզի օրգանիզմը մաքրվի: Դեպքը տեղի է ունեցել գազի արտահոսքից. տուրբինը չի աշխատել, գազն էլ ներս է լցվել: Հերթով սկսել են վատ զգալ իրենց, բայց հասցրել են շտապօգնություն կանչել»,- ասաց Ավետիսյանը: