ԵԱՀԿ ՄԽ համանախագահները մեկ խնդիր ունեն` կանխել ռազմական հնարավոր զարգացումները. Շավարշ Քոչարյան

Կառավարության նիստից հետո լրագրողների հետ զրույցում Հայաստանի փոխարտգործնախարար Շավարշ Քոչարյանը հայտարարեց, որ ԵԱՀԿ Մինսկի խմբի համանախագահները Ղարաբաղյան հակամարտության շուրջ բանակցություններում այսօր մեկ խնդիր ունեն՝ կանխել ռազմական հնարավոր զարգացումները:

«Նրանց թիվ մեկ խնդիրն այն է, որ հասնեն նրան, որ ռազմական լարվածության աստիճանը նվազի»,- ասաց նա, ապա հավելեց, որ համանախագահները կենտրոնացած են հենց այս հարցի վրա:

Քոչարյանի խոսքով` ԵԱՀԿ Մինսկի խմբի համանախագահների մյուս առաքելությունը` նպաստել, որ կողմերը գան ինչ-որ համաձայնության, չի իրականացվում: «Նրանք շատ լավ հասկանում են, որ այս հարցում խոսել որևէ առաջընթացի մասին անհնարին է, և դրա պատճառը Ադրբեջանն է` իր քաղաքականությամբ»,- ընդգծեց փոխարտգործնախարարը: