Իրանի հոգևոր գերագույն առաջնորդը Հասան Ռոհանիին հաստատել է նախագահի պաշտոնում

Իրանի հոգևոր գերագույն առաջնորդ այաթոլլա Ալի Խամենեին այսօր երկրի նախագահի պաշտոնում հաստատել է երկրորդ ժամկետով վերընտրված Հասան Ռոհանիին. հայտնում է РИА Новости-ն` IRIB հեռուստաալիքին հղումով:

Այդ արարողությունը Իրանի նախագահի երդման արարողության առաջին փուլն է:

«Ես, հետևելով Իրանի ժողովրդի ընտրությանը, հավանություն եմ տալիս քվեարկության արդյունքներին և հաստատում Հասան Ռոհանիին Իրանի Իսլամական Հանրապետության նախագահի պաշտոնում»,- ասվում է այաթոլլայի հրամանում, որը նա անձամբ հանձնել է Ռոհանիին:

Իրանի նախագահի ընտրություններն անցկացվել են մայիսի 19-ին: Ռոհանին ստացել էր ընտրողների ձայների 57 տոկոսը: Նախագահի երդման արարողությունը տեղի կունենա խորհրդարանում օգոստոսի 5-ին: