Էրդողանի այցից առաջ ԱՄՆ կոնգրեսականները դիմել են Թրամփին

ԱՄՆ Հանրապետական և Դեմոկրատական կուսակցություններից 62 կոնգրեսական Թուրքիայի նախագահ Էրդողանի` ԱՄՆ այցից առաջ նամակ է հղել նախագահ Դոնալդ Թրամփին Թուրքիայում ժողովրդավարական նորմերի անկման ու մամուլի ազատության սահմանափակումների վերաբերյալ:

Ըստ Gazeteduvar-ի՝ կոնգրեսականները նամակում հիշեցրել են ապրիլի 16-ին սահմանադրական փոփոխությունների վերաբերյալ հանրաքվեի մասին՝ նշելով, որ այն անցկացվել է լարված մթնոլորտում և հեղաշրջման փորձից հետո մի քանի անգամ երկարացված արտակարգ դրության պայմաններում:

Կոնգրեսականները նաև  անդրադարձել են խոսքի ազատությանն ու այդ երկրի բանտերում գտնվող լրագրողներին և ընդդիմության գործիչներին: Նրանց համոզմամբ՝  Թուրքիայում խոսքի ազատությունը ճնշվում է դատական համակարգի միջոցով: 

Կոնգրեսականները խնդրել են Թրամփին` վճռական քայլեր ձեռնարկել Թուրքիայում տիրող իրավիճակը շտկելու համար: