Ցուկերբերգը ցուցադրել է վիրտուալ իրականության ձեռնոցների նախատիպը

Facebook սոցցանցի հիմնադիր Մարկ Ցուկերբերգը ցուցադրել է վիրտուալ իրականության հետ փոխազդեցության նոր միջոցը՝ սոցցանցին պատկանող Oculus ընկերության ձեռնոցների նախատիպը, հայտնում է Korrespondent.net-ը:

Նա իր էջում տեղադրել է Ռեդմոնդում Facebook-ի գիտահետազոտական լաբորատորիա այցելության լուսանկարները:

«Մենք աշխատում ենք նոր միջոցների վրա, որոնք թույլ են տալիս ձեռքերը մտցնել վիրտուալ իրականություն: Այդ ձեռնոցներով դուք կարող եք նկարել, տպագրել վիրտուալ ստեղնաշարի վրա և անգամ սարդոստայն նետել, ինչպես Սարդ-մարդը», - գրել է Մարկ Ցուկերբերգը:

Նա չի հայտնել վիրտուալ իրականության սարքի տեխնիկական բնութագրերը կամ շուկայում ներկայիս նախատիպի հիման վրա կոմերցիոն արտադրանքի հայտնվելու մոտավոր ժամկետը: