ՀԱԿ-ի ցուցակը գլխավորելու է Լևոն Տեր-Պետրոսյանը. Զուրաբյան

Հայ ազգային կոնգրեսի ցուցակը խորհրդարանական ընտրություններում գլխավորելու է առաջին նախագահ, կուսակցության ղեկավար Լևոն Տեր-Պետրոսյանը. այսօր խորհրդարանական ճեպազրույցներում հայտարարեց ՀԱԿ խմբակցության ղեկավար Լևոն Զուրաբյանը:

Հարցին, թե ընտրություններին դաշինքով գնալու դեպքո՞ւմ էլ Տեր-Պետրոսյանը կգլխավորի ցուցակը, նա արձագանքեց. «Բանակցություններ հնարավոր են դաշինքների համար, բայց չեմ կարծում, որ ավելի լավ թեկնածու ինչ-որ մեկը կարող է առաջադրել՝ ցուցակը գլխավորելու համար»:

Արձագանքելով դիտարկմանը, թե 2013 թվականի նախագահական ընտրությունների առաջադրման պահին Լևոն Տեր-Պետրոսյանը հայտարարեց, որ տարիքի պատճառով չի կարող առաջադրվել և հարցին՝ իսկ հիմա չկա՞ այդ խնդիրը, Զուրաբյանը պատասխանեց, որ այն ժամանակ խոսքը նախագահական ընտրությունների մասին էր, իսկ այս պարագայում նման խնդիր չի տեսնում: