Ուրախ ենք, որ բարձր ենք պահել մեր երկրի պատիվը. Գոռ Մինասյան

Ռիո դե Ժանեյրոյում կայացած օլիմպիական խաղերում արծաթե մեդալ նվաճած ծանրամարտիկ Գոռ Մինասյանն այսօր տեղի ունեցած մամուլի ասուլիսի ընթացքում խոսեց նվաճած մեդալի մասին:

«Տպավորություններս աննկարագրելի են: Երկար էինք պատրաստվել օլիմպիական խաղերին: Մեծ աշխատանք ենք կատարել, և կարծում եմ` արդարացրել ենք ազգի, ղեկավարության և մարզիչների հույսերը: Ուրախ ենք, որ Հայաստանի դրոշն ենք բարձրացրել օլիմպիական խաղերում և բարձր ենք պահել մեր երկրի պատիվը: Հայաստանի նման փոքր երկրի համար սա սենսացիա է»,- ասաց ծանրամարտիկը:

Անդրադառնալով ՀԱՕԿ նախագահ Գագիկ Ծառուկյանի կողմից իրեն 4 սենյականոց բնակարան նվիրելու մասին լուրերին` Մինասյանն ասաց. «Պետք չէ անընդհատ շահարկել «նվեր» բառը: Այդ բնակարանը ստացել եմ իմ արդյունքների համար: Ես Հայաստանի համար քիչ բան չեմ արել՝ օլիմպիական խաղերի արծաթե մեդալակիր եմ դարձել, և կարծում եմ` արժանացել եմ դրան»: