Նստել ենք մեր մեքենաներն, ու սկսել են քարերով հարվածել. գյումրեցի երկրպագու

Արդեն հայտնել ենք, որ Եվրոպա լիգայի խաղարկության որակավորման առաջին փուլի «Դիլա» (Վրաստան)-«Շիրակ» խաղից հետո վրացի  երկրպագուներն աչքի են ընկել ագրեսիվ պահվածքով. կան վնասված ավտոմեքենաներ: Դեպքի մանրամասները ճշտելու համար Yerkir.am-ը կապ հաստատեց Գյումրիի  «Շիրակ»-ի «Սև հովազներ» ֆան-ակումբի անդամ Նարեկ Խաչիկյանի հետ, ով հայտնեց հետևյալը.

«Գյումրիից  Գորի ենք մեկնել մոտ 200 հոգանոց խմբով:  Սկզբում ամեն ինչ նորմալ էր` երկրպագում էինք մեր սիրելի թիմին: Խաղի ընթացքում վրացի երկրպագուները  պրովոկացիաների էին դիմում: Լեզուն չէինք հասկանում, բայց  անվայել ժեստեր էին  թույլ տալիս իրենց: Խաղից հետո մարզադաշտից դուրս ենք եկել  ոստիկանների ուղեկցությամբ: Նստել ենք մեր մեքնենաներն ու  սկսել են քարերով հարվածել մեքենաներին, ինչի հետևանքով վնասվել են ավտոմեքենաների ապակիները:  Տուժածներ չունենք:  Մեր անձնակազմի բոլոր անդամները հիմա Գյումրիում են»,-ասաց Խաչիկյանը:

Հիշեցնենք, որ «Շիրակ»-ը պարտվել է 0:1 հաշվով: Թիմերի պատասխան հանդիպումը տեղի կունենա հունիսի 7-ին` Գյումրիում:

Լուսանկարը` Գևորգ Ղազարյանի