Օլիմպիական խաղերին միայն մասնակցության համար չեմ մեկնում. Լևան Բերիանիձե

Ազատ ոճի ըմբշամարտի Հայաստանի հավաքականի անդամ, գերծանր քաշային Լևան Բերիանիձեն ՀԱՕԿ լրատվականի հետ զրույցում խոսել է վնասվածքի, մարզավիճակի և Ռիոյի խաղերից սպասելիքների մասին:

«Ամեն ինչ արդեն կարգին է: Վնասվածքից վերականգնվել եմ և շարունակում եմ մարզումներս: Պետք է այնպիսի մարզավիճակ ձեռք բերեմ, որ Ռիոյի օլիմպիական խաղերին ավելի լավ ներկայանամ, քան աշխարհի առաջնության ժամանակ և անպայման Հայաստանի համար մեդալ նվաճեմ: Դա ինձ համար կարևորագույն խնդիր է: Հենց այնպես չեմ մեկնում Խաղերին՝ ուղղակի մասնակցության համար: Աստծո կամքով մեդալով կվերադառնամ այնտեղից»,- ՀԱՕԿ լրատվականի հետ զրույցում նշել է ըմբիշը:

Բերիանիձեն Հայաստանի ազատ ոճի ըմբշամարտի հավաքականի առաջին մարզիկն էր, ում հաջողվեց Ռիոյի օլիմպիական խաղերի ուղեգիր ձեռք բերել Վեգասում կայացած աշխարհի առաջնության ժամանակ: