Թուրքիայից փախած դատախազն իր երկրի դեմ փաստաթղթերը կարող է տրամադրել Գերմանիայի հատուկ ծառայություններին

Գերմանիա փախած հետախուզվող երկու թուրք դատախազներ Զեքերյա Օզն ու Ջելալ Քարան փախուստի ժամանակ իրենց հետ տարել են պետական գաղտնիք պարունակող փաստաթղթեր. այդ մասին տեղեկացնում է թուրքական Sonhaber-ը՝ վկայակոչելով երկրի հետախուզական ծառայությունների տվյալները:

Ըստ կայքի, հնարավոր է Օզը կառավարության դեմ օգտագործվելիք փաստաթղթերը տրամադրի Գերմանիայի հատուկ ծառայություններին՝  իրեն Թուրքիային չհանձնելու դիմաց:

Թուրքական կայքն այնուհետև մեղադրել է գերմանական կառավարությանը՝ «Զուգահեռ պետությանն» աջակցելու համար:

Հիշեցնենք, որ օրեր առաջ Թուրքիայից փախուստի էին դիմել հետախուզվող հայտնի դատախազներ Զեքերյա Օզն ու Ջելալ Քարան: Չնայած ՀՀ ԱԱԾ-ն հերքել էր թուրք դատախազների՝ Հայաստան ժամանելու մասին թուրքական կողմի պնդումները, այնուամենայնիվ թուրքական մամուլում շարունակվում է շրջանառվել այն տեսակետը,  թե դատախազները փախել են Վրաստան, ապա՝ Հայաստան, այնուհետև՝ Գերմանիա: