Ազնավուրի և նրա երկրպագու տատիկի հուզիչ հանդիպումը (ՏԵՍԱՆՅՈՒԹ)

Աշխարհահռչակ երգիչ Շառլ Ազնավուրը երեկ Մոսկվայում կայացած համերգից հետո հանդիպել է իր տարեց երկրպագու Լիդա տատիկի հետ. հայտնում է Комсомольская правда-ն:

Հիշեցնենք, որ մայիսի վերջին Լիդա տատիկի պատմությունը ցնցել էր համացանցը։ «Коммерсант»-ի թղթակիցը թերթի կրպակի մոտ հանդիպել էր Լիդա տատիկին, ով ասել էր, որ երկրպագում է Ազնավուրին և շատ կցանկանար գնալ նրա համերգին: Այս պատմությունը հասել էր անգամ Ազնավուրին, ով տատիկին հրավիրել էր իր համերգին: Մնում էր միայն գտնել համեստ տատիկին, և վերջապես դա հաջողվեց:

Комсомольская Правда-ն գրում է, որ Լիդիա Իվանովնան զարմացել է՝ իմանալով Ազնավուրի հետ հանդիպելու մասին։ Սկզբում համեստ տատիկը մերժել է հրավերը, սակայն Ազնավուրի հանդեպ նրա ունեցած մեծ սերը, ի վերջո, հաղթել է։