Ինչո՞ւ ՀԱՊԿ-ը չի արձագանքում սահմանին տիրող իրավիճակին

Լրագրողների հետ հանդիպման ժամանակ ԱԳ նախարար Էդվարդ Նալբանդյանը, պատասխանելով հարցին, որ հայ-ադրբեջանական սահմանին իրավիճակի սրման, նաև մի շարք արտաքին քաղաքական ձախումների պատճառով չի՞ պատրաստվում հրաժարական տալ, բացի այդ` ՀԱՊԿ-ը արձագանքելո՞ւ է սահմանային լարվածությանը ոչ թե հայտարարությունների, այլ գործողությունների ձևով, նշեց. «Հարցը տալուց առաջ պետք է մանրամասն ծանոթանալ պայմանագրերին: Ծանոթացեք ՀԱՊԿ-ի կանոնադրությանը և կգտնեք ձեր հարցի պատասխանը:

Ինչ վերաբերում է նրան, որ մեկ լրատվամիջոցի պահանջը ընդունեմ ու հրաժարական ներկայացնեմ, ուրեմն շատ պարզունակ կգտնվեմ: Դուք սխալվում եք, թե դա հասարակության կարծիքն է, ես գիտեմ հասարակության կարծիքը: Թողեք, թող հասարակությունը իր կարծիքն ունենա»