Ադրբեջանի սարսափեցնող գործողությունները սպառնում են տարածաշրջանի կայունությանը. ԱՄՆ կոնգրեսական

Ամերիկացի կոնգրեսական Ադամ Շիֆը դատապարտել է Լեռնային Ղարաբաղում ուղղաթիռի կործանումը. հայտնում է Новости Армения-ն: Նա նշել է, որ այդ սարսափեցնող գործողությունները սպառնում են տարածաշրջանի կայունությանը:

«Ակնհայտ է, որ Լեռնային Ղարաբաղի Հանրապետության տարածքում անզեն ուղղաթիռի կործանումը ցույց է տալիս մարդկային կյանքերի նկատմամբ Ադրբեջանի արհամարհանքը և ցուցադրում երկրի պատրաստակամությունը բռնության սադրիչ գործողություններ իրականացնել՝ ներքին խնդիրներից հանրության ուշադրությունը շեղելու համար»,- ասել է Ադամ Շիֆը:

Հիշեցնենք, որ երեկ՝ նոյեմբերի 12-ին, ղարաբաղա-ադրբեջանական սահմանի արևելյան հատվածի օդային տարածքում ժամը 13.45-ի սահմաններում ուսումնավարժական թռիչքի ժամանակ ադրբեջանական ԶՈՒ-ի կողմից հրադադարի ռեժիմի խախտման արդյունքում խոցվել է ԼՂՀ ՌՕՈւ ՄԻ-24 ուղղաթիռը: