Կուտակայինն ընդունվեց երկրորդ ընթերցմամբ, իսկ Գալուստ Սահակյանը հեգնեց ընդդիմադիրներին

Հենց նոր Ազգային ժողովի արտահերթ նիստում երկրորդ ընթերցմամբ ևս ընդունվեց կուտակային կենսաթոշակների մասին օրենքի նախագիծը:

ԱԺ նախագահ Գալուստ Սահակյանը նախ հայտարարեց, որ կողմ է քվեարկել 67 պատգամավոր, դեմ, ձեռնպահ չկա: Այնուհետև ասաց, որ կողմ է քվեարկել 68 պատգամավոր, դեմ, ձեռնպահ չկա: «Որոշումն ընդունվել է»,- հայտարարեց Գալուստ Սահակյանը:

Այս քվեարկությանը ընդդիմադիր ուժերը չէին մասնակցում. նրանք, որպես բողոքի նշան, լքել էին ԱԺ նիստերի դահլիճն այս առավոտյան կուտակային կենսաթոշակի մասին օրենքի առաջին ընթերցմամբ քվեարկությանը հաջորդած սկանդալից հետո:

Կուտակային կենսաթոշակների մասին օրինագծի քվեարկությունից առաջ հանրապետականները կողմ քվեարկեցին մոտ 30 օրինագծի: Այդ ընթացքում Գալուստ Սահակյանը հեգնեց ընդդիմադիրներին` ասելով. «Ճիշտն ասած, շատ դժվար է առանց ընդդիմության»: