Ադրբեջանում կարող է կրկնվել «Եվրամայդանը». Ադրբեջանում ԱՄՆ դեսպան

Ադրբեջանում ԱՄՆ դեսպան Ռիչարդ Մորնինգսթարն «Ազադլըգ» ռադիոկայանին տված հարցազրույցում, անդրադառնալով  քաղաքացիական հասարակության նկատմամբ ճնշումների մասին հարցին, նշել է, որ Ադրբեջանում կարող են կրկնվել ուկրաինական Մայդանի իրադարձությունները. հայտնում է haqqin.az-ը:

«Եթե կառավարությունն ավելի կոշտ քաղաքականություն վարի քաղաքացիական հասարակության նկատմամբ, ապա Մայդանի իրադարձությունները կարող են կրկնվել նաև Բաքվում: Եթե անգամ ոչ այժմ, ապա 5-10 տարուց: Եթե քաղաքացիական հասարակության հնարավորություններն էլ ավելի սահմանափակվեն, դա կմեծացնի այդպիսի իրադարձությունների կրկնվելու վտանգը»,- ասել է դիվանագետը։

Մեկնաբանելով «Ադրբեջանին 7 շրջանները վերադարձնելու մասին»` ԵԱՀԿ ՄԽ ամերիկացի համանախագահ Ջեյմս Ուորլիքի հայտարարությունը՝ Մորնինգսթարը նշել է, որ նա բարձրաձայնել է ԱՄՆ պաշտոնական դիրքորոշումը։

Դեսպանը նաև նշել է, որ եթե Ադրբեջանը և Հայաստանը վերջապես պայմանավորվեն խաղաղության վերաբերյալ, ապա այդ ժամանակ դրան կարող է խանգարել Ռուսաստանը՝ երկու պետությունների վրա ազդեցության լծակները պահպանելու համար։