Բողոքող քաղաքացիների պահանջներն անհեթեթ են. կառավարության ներկայացուցիչ

Այսօր կառավարության շենքի առջև բողոքի ցույց իրականացնող քաղաքացիները բողոք-նամակ հանձնեցին կառավարության աշխատակազմի` քաղաքացիների ընդունելության և դիմումների քննարկման վարչության պետ Ալեքսանդր Ղազարյանին: Հիշեցնենք, որ քաղաքացիները բողոքում են կենսաթոշակների պարտադիր բաղադրիչի դեմ:

Լրագրողների հետ զրույցում Ալեքսանդր Ղազարյանը տարակուսանքը հայտնեց, թե բողոքի ակցիայի բոլոր մասնակիցներն անհեթեթ պահանջներ են ներկայացնում և անհեթեթ բաներ խոսում: «Այնպիսի տպավորություն է, որ նրանք բացարձակ տեղյակ չեն այս օրենքից: Ես կարծում եմ, որ նրանք չեն կարդացել ու չեն ուսումնասիրել օրենքը»,- ասաց նա:

Yerkir.am-ի հարցին` մասնավորապես, բողոքող քաղաքացիների ո՞ր պահանջն է անհեթեթ, Ալեքսանդր Ղազարյանը պատասխանեց. «Բոլոր պահանջները, օրինակ` որ զրկվում են իրենց սեփականությունից, բայց այդպիսի բան չկա, իրենց սեփականությունը պարզապես կուտակվելու է»: