Հայաստանի` մինչև 19 տարեկանների հավաքականը մեկնեց Լեհաստան

Այսօր Հայաստանի` մինչև 19 տարեկանների հավաքականը՝ Աբրահամ Խաշմանյանի գլխավորությամբ, մեկնել է Լեհաստան, որտեղ կմասնակցի Եվրոպայի` մինչև 19 տարեկանների 2014 թ. առաջնության որակավորման փուլի խմբային մրցաշարին. հայտնում է ՀՖՖ պաշտոնական կայքը:

Մեր հավաքականն ընդգրկվել է 2-րդ խմբում, որտեղ նրանց  մրցակիցներն են Ռումինիայի, Լեհաստանի և Լիտվայի հավաքականները: Հայաստանի հավաքականն առաջին հանդիպումը կանցկացնի հոկտեմբերի 10-ին՝ Ինովրոցլավ քաղաքում մրցելով Ռումինիայի հավաքականի հետ: Երկրորդ տուրում՝ հոկտեմբերի 12-ին, Հայաստանի հավաքականը Տուչոլա քաղաքում կխաղա տանտերերի՝ Լեհաստանի հավաքականի հետ, իսկ վերջին տուրը տեղի կունենա հոկտեմբերի 15-ին: Այդ օրը Հայաստանի հավաքականը Տուչոլայում կմրցի Լիտվայի հավաքականի հետ: