Վարչապետը Մաքսային միության վերաբերյալ հայտարարություն կանի

Արդեն տեղեկացրել ենք, որ ՀՀԿ ԳՄ նիստից առաջ, ի պատասխան Yerkir.am-ի թղթակցի հարցին, վարչապետ Տիգրան Սարգսյանը հստակ հայտարարել էր, որ չի փոխել իր դիրքորոշումը Մաքսային միությանն անդամակցելու վերաբերյալ: Իսկ ինչպես հայտնի է, նա անհնար էր համարում այդ միությանն անդամակցությունը ընդհանուր սահմանների բացակայության պատճառով եւ, մեղմ ասած, այդքան էլ կողմ չէ այդ միությանը:

Այսօր Yerkir.am-ի թղթակիցը Եռաբլուրում վարչապետ Տիգրան Սարգսյանից փորձեց պարզաբանում ստանալ, թե, ի վերջո, որն է նրա դիրքորոշումը այդ հարցում:

«Սիրելիս, այսօր տեղը չէ եւ առիթը չէ: Այսօր մեր անկախության օրն է»,- ասաց Տիգրան Սարգսյանը:

Դիտարկմանը, որ Մաքսային միությանն անդամակցելու հարցը հեռու չէ մեր անկախության տոնից, վարչապետը պատասխանեց, որ անպայման հրապարակային հայտարարություն կանի: