ԿՀՎ-ն եւ ''Մոսադը'' ԱԷՄԳ-ին մոլորության մեջ են գցում. Իրան

Իրանի ժողովուրդը վճռական է միջուկային էներգետիկայի բարիքներից օգտվելու հարցում` չնայած ԱՄՆ-ի պատժամիջոցներին ու քաղաքական ճնշումներին. ըստ Regnum-ի` երեկ Վիեննայում անցկացված ասուլիսում հայտարարել է Ատոմային էներգիայի միջազգային գործակալությունում Իրանի ներկայացուցիչ Ալի Ասհար Սոլթանիեն:

Ըստ նրա` Իրանի միջուկային ծրագրի հարցով գործակալության վերջին զեկույցը անընդունելի է, քանի որ կոչված է «քաղաքական լարվածություն» ստեղծել: Նա համոզված է, որ ամերիկյան եւ իսրայելական հետախուզությունները մշտապես փորձում են ազդել այդ զեկույցների բովանդակության վրա, գործակալությանը ստահոդ տեղեկություններ են տալիս:

Սոլթանիեն հայտարարել է, որ Իրանը հավատարիմ է միջուկային զենքը տարածել արգելող արձանագրություններին: «Մեր միջուկային ծրագիրը շատ պարզ է: Միջուկային զենքը տեղ չունի մեր միջուկային դոկտրինում»,- հավելել է նա: