Դպրոցների տնօրենները նկատողություն են ստացել. ''ՀԺ''

Երևանի քաղաքապետը հանրակրթական երկու դպրոցներում արձանագրված նախընտրական քարոզչության եւ քաղաքական գործունեություն իրականացնելու փաստերով խիստ նկատողություն է հայտարարել ուսումնական հաստատությունների տնօրեններին. գրում է «Հայկական ժամանակ» թերթը: Սա, գրում է «ՀԺ»-ն, հայտնում են քաղաքապետարանից, իսկ թե խոսքը որ դպրոցների մասին է, պետք է միայն կռահել:

Թերթը ենթադրում է, որ նկատողություն ստացածներից մեկը թիվ 191 դպրոցի տնօրենն է: «Հժ»-ն նախորդ համարում գրել էր, թե ինչպես էր Մալաթիա-Սեբաստիա վարչական շրջանում գտնվող այս դպրոցում հյուրընկալվել թաղապետ Դավիթ Օհանյանն ու մանկավարժներին նախընտրական հրահանգներ տալիս: Դրանից հետո ԿԳ նախարար Արմեն Աշոտյանը ֆեյսբուքյան իր էջում համոզմունք էր հայտնել, որ քաղաքապետն այս ամենը անհետևանք չի թողնի: Եվ ահա հետևանքը:

Թաղապետը նկատողություն չի ստացել, միայն դպրոցի տնօրենը, գրում է թերթը: Իշխանությունները վերը նշված երեւույթների մասին «տեղեկանում են» մամուլից կամ համացանցից: Այնինչ` նույն Դավիթ Օհանյանը նշված հանդիպման ժամանակ պատմում է, որ այլ դպրոցներում ու մանկապարտեզներում ևս նախընտրական հրահանգներ է տվել, տեղեկացնում է «Հայկական ժամանակը»: