Արտաամուսնական կապեր չունե՞ս, պաշտոնդ կբարձրացվի

ԱՄՆ նախագահ Բարաք Օբաման ՆԱՏՕ-ի Եվրոպայում գտնվող ուժերի գլխավոր հրամանատարի պաշտոնում կառաջադրի գեներալ Ջոն Ալենի թեկնածությունը: Այս մասին հաղորդում է BBC-ն` նշելով, որ Պենտագոնը նրա վարքի առնչությամբ կասկածներ չունի:

Հիշեցնենք, որ Միացյալ Նահանգների Կենտրոնական հետախուզական վարչության նախկին ղեկավար Դեւիդ Պետրեուսի արտաամուսնական կապերի բացահայտումից եւ դրան հաջորդած հրաժարականից հետո տեղեկություններ էին շրջանառվում, թե Ալենը էլեկտրոնային փոստով սիրախաղի մեջ է մի ամուսնացած կնոջ հետ, ինչը հակասում է սպայի վարքագծի մասին օրենքին: Պենտագոնն այդ ժամանակ կոչ էր արել Օբամային` հետաձգել Ալենին ավելի բարձր պաշտոնի նշանակելը: