Գումարելիների տեղերը փոխելիս գումարը չի փոխվի

Պաշտոնանկությունները, որոնք դեռ շարունակվելու են, ապացույցն են այն բանի, որ իշխանությունները նախապատրաստվում են ընտրություններին: Այս մասին «Երկիր»-ի հետ զրույցում նշեց նախկին արտգործնախարար, «Ազատ դեմոկրատների»-ի անդամ Ալիկ Արզումանյանը եւ վստահեցրեց, որ դիրքային պայքար է գնում, Հանրապետականն էլ ապահովում է իր դիրքերը:

Թե որ պաշտոնյան որ պաշտոնից ուր է գնում կամ գնալու, Արզումանյանը դժվարացավ պատասխանել, բայցեւ նշեց, որ «գումարելիների տեղերը փոխելիս գումարը չի փոխվի»:

Նա վստահեցրեց նաեւ, որ պաշտոնանկություններ լինելու են ինչպես ուժային կառույցներում, այնպես էլ սոցիալական ոլորտում: Եվ եթե առաջինի դեպքում, ըստ Արզումանյանի, պաշտոնանկությունը իշխանությունը կծառայեցնի իր դիրքերն ամրապնդելուն, ընտրությունները կեղծելու մեխանիզմը վերահսկելուն, ապա երկրորդի դեպքում պարզապես փորձ կարվի ցույց տալ ժողովրդին, թե բարեփոխումներ են արվում, պայքար է գնում կոռուպցիայի վերացման դեմ: