ՀՀ նախագահը ցավակցել է Վանուշ Խանամիրյանի մահվան կապակցությամբ

ՀՀ նախագահի մամուլի գրասենյակից հայտնում են, որ նախագահ Սերժ Սարգսյանն այսօր ցավակցական հեռագիր է հղել Հայաստանի ժողովրդական արտիստ, հայ պարարվեստի երախտավոր Վանուշ Խանամիրյանի մահվան կապակցությամբ:

Վանուշ Խանամիրյանի ընտանիքին, հարազատներին ու գործընկերներին, ինչպես նաև նրա բարձր արվեստի բոլոր երկրպագուներին ուղղված ցավակցական հեռագրում ասված է.

«Վանուշ Խանամիրյանը մեր մշակույթի այն գործիչներից է, ով նշանակալի ներդրում է ունեցել հայ արվեստի զարգացման եւ այն աշխարհում ճանաչելի դարձնելու գործում: Նրա անզուգական կատարումները բարձր են գնահատվել թե՛ մասնագետների, թե՛ նրանով հիացող հազարավոր հանդիսատեսների կողմից: Նա արժանիորեն վայելում էր մեծ ժողովրդականություն եւ իր ուրույն ավանդն էր բերում եւ՛ որպես մշակույթի կազմակերպիչ, եւ՛ իր հայրենանվեր, քաղաքացիական դիրքորոշմամբ: Վանուշ Խանամիրյանի անունը եւ վառ կերպարը հավերժ կմնան մեր սրտերում եւ հայ արվեստի պատմության մեջ»: