Թուրքական դատարանը պահանջում է Դինքի գործով հեռախոսազրույցների ձայնագրությունները

Թուրքական դատարանը մերժել է Թուրքիայի հեռահաղորդակցությունների տնօրինության բողոքարկումը, ըստ որի` փորձ էր արվում չեղյալ համարել դատավճիռը, որով ընկերությունը դատարանին պետք է ներկայացներ «Ակօս» թերթի խմբագիր Հրանտ Դինքի սպանության ժամանակ մոտակայքում եղած մարդկանց հեռախոսազրույցների ձայնագրությունները. տեղեկացնում է «Զաման» օրաթեթրը:

Ընկերությունը համարում է, որ դա կարող է որակվել որպես մարդկանց մասնավոր կյանքին միջամտություն:

Թերթը գրում է, որ ընկերությունը ամեն հինգ տարին մեկ ջնջում է հեռախոսազրույցների ձայնագրությունները, հետեւաբար ընդամենը մի քանի ամիս է մնացել, որ Դինքի գործին առնչվող հեռախոսազրույցները վերացվեն:

Հիշեցնենք, որ «Ակօս»-ի խմբագրին սպանող Օգյուն Սամասթը դատապարտվել է 21տարի 6 ամիս ազատազրկման: