Ռուսաստանը համոզեց Իրանին` լուծել միջուկային խնդիրը

Իրանի նախագահ Մահմուդ Ահմադինեժադը երեկ հայտարարել է, որ միջուկային խնդրի լուծման` Ռուսաստանի առաջարկած տարբերակն ընդունելի է իր երկրի համար. հաղորդում է «Ինտերֆաքսը»:

«Իրանի Իսլամական Հանրապետությունն ընդունում է ռուսական` «քայլ առ քայլ» լուծման տարբերակը եւ պատրաստ է սկսել այս ոլորտում համագործակցությունը»,- նշված է Ահմադինեժադի հայտարարության մեջ, որը հրապարակվել է Ռուսաստանի անվտանգության խորհրդի քարտուղար Նիկոլայ Պատրուշեւի հետ երեկվա հանդիպումից հետո:

Պատրուշեւը իրանական իշխանությունների հետ սկսել է բանակցել ցերեկը եւ դեռեւս այդ ժամանակ հայտնել է հաջողություն ունենալու մասին:

«Մենք խոսել ենք բազմակողմանի համագործակցության մասին: Եվ, մասնավորապես, խոսել ենք իրանական միջուկային հիմնախնդրի մասին: ... Բանակցությունները բացառիկ արդյունավետ են»,- ասել էր նա: