Ոչնչացրել են նացիստի գերեզմանը

Գերմանիայի իշխանությունները որոշում են ընդունել ոչնչացնել Ադոլֆ Հիտլերի ամենամտերիմ համախոհներից մեկի` Ռուդոլֆ Հեսի գերեզմանը:

Ինչպես տեղեկացնում է Gazeta.ru-ն, Հեսի գերեզմանը, որը գտնվում է բավարյան Վունզիդել քաղաքում, դարձել է նեոնացիստների հավաքատեղի: 1987 թվականից ծայրահեղական աջերը ամեն տարի այցելում են նրա գերեզմանին, ծաղկեփնջեր դնում եւ նացիստների ողջույնի ժեստով ձեռքերը վեր պարզում:

2005 թվականին Վունզիդելը իրավունք է ստացել արգելել Հեսի հիշատակին կազմակերպվող նացիստական երթերը, սակայն քաղաքի ղեկավարները որոշել են այդ իրավունքից օգտվելու փոխարեն պարզապես վերացնել հավաքատեղին:

Չորեքշաբթի օրը առավոտյան ժամը 4-6 ընկնած ժամանակահատվածում փորել են Հեսի գերեզմանը եւ դուրս բերել նրա ոսկորները: Նախատեսվում է, որ դրանք դիակիզվելու են եւ փոշին քամուն են տալու: