ՀՀ-ում կարմրուկի համաճարակ չկա

Այս տարի եվրոպական տարածաշրջանում շարունակում է տարածվել կարմրուկի վիրուսը` դառնալով չպատվաստված մարդկանց հիվանդության, երբեմն նաև` մահվան պատճառ. տեղեկացնում է ՀՀ առողջապահության նախարարությունը:

Առողջապահության համաշխարհային կազմակերպության տվյալներով` 2011թ. մայիսի 6-ի դրությամբ եվրոպական տարածաշրջանի 38 երկրում գրանցվել է կարմրուկի 7028 հաստատված դեպք: Հիվանդների 29 տոկոսը չի ստացել կարմրուկի դեմ ոչ մի պատվաստում, իսկ 67 տոկոսի դեպքում բացակայում են կարմրուկի դեմ պատվաստումների տվյալները:

Հայաստանում  համաճարակային իրավիճակը կարմրուկի առումով հանգիստ է: Վերջին բռնկումը եղել է 2004-2005թթ.: Հանրապետությունում կարմրուկի համաճարակային իրավիճակի կայունությունը հիմնականում պայմանավորված է 2007թ. իրականացված կարմրուկի-կարմրախտի դեմ լրացուցիչ պատվաստումներում երեխաների մեծ քանակի ընդգրկմամբ: