Զենքն ու զրահատեխնիկան անշահախնդիր փոխանցվելու են ՀՀ զինված ուժերին

Ռուսաստանի զինված ուժերի` Հայաստանում տեղակայված 102-րդ ռազմակայանն անցել է բրիգադային համակարգի, սակայն օպտիմալացումը չի ազդել զորամիավորումների մարտական պատրաստվածության եւ մարտունակության վրա. հայտարարել է ՌԴ պաշտպանության նախարարության ԱՊՀ երկրների հետ ռազմական համագործակցության վարչության պետ, գնդապետ Անդրեյ Գուսեւը:

Երեկ Պետդումայի Դաշնային խորհրդում ռազմակայանի վերաբերյալ Ռուսաստանի եւ Հայաստանի միջեւ ստորագրված արձանագրության վավերացման դաշնային օրենքի քննարկման ժամանակ նա նշել է, որ ներկայումս ռազմակայանում 4245 զինծառայող կա. տեղեկացնում է «Ինտերֆաքսը»:

Հարցին, թե ե՞րբ է վերատեղակայվելու լրացուցիչ զենքն ու զրահատեխնիկան, Գուսեւը պատասխանել է, որ դրանք անշահախնդիր փոխանցվելու են Հայաստանի Հանրապետության զինված ուժերին:

Դաշնային խորհրդի պաշտպանության եւ անվտանգության հանձնաժողովի ղեկավար Վիկտոր Օզերովը նշել է, որ արձանագրության վավերացումը կնպաստի Ռուսաստանի եւ Հայաստանի ռազմա-քաղաքական համագործակցության ամրապնդմանը, եւ դա բխում է Ռուսաստանի շահերից: