Ջուր կունենան եւս մի քանի գյուղերում

Մայիսի 31-ին «Հայաստան» համահայկական հիմնադրամի հոգաբարձուների խորհրդի նիստում կորոշվի, թե հաջորդ մարաթոնի արդյունքում հանգանակված գումարներն ինչին կուղղվեն.  հայտարարել է հիմնադրամի գործադիր տնօրեն Արա Վարդանյանը, որի կարծիքով` «Ջուրը կյանք է» կարգախոսով ծրագիրն անպայման պետք է իր շարունակությունն ունենա։

Հիմնադրամի վերոհիշյալ ծրագրի շնորհիվ այսօր  ջրով արդեն ապահովված են Ասկերանի շրջանի Նորագյուղ եւ Ավետարանոց գյուղերը։ Աշխատանքներն ընթացքի մեջ են Սարգսաշեն, Տող, Մարտունի, Ասկերան, Բերձոր համայնքներում։

Արա Վարդանյանի խոսքերով` նախատեսում են աշխատանքներ սկսել եւս 3-4 գյուղերում, այդ կապակցությամբ բարերարների հետ բանակցություններ են ընթանում։

Բացի ջրամատակարարման աշխատանքներից, հիմնադրամի հովանավորությամբ եւ ԼՂՀ կառավարության համաֆինանսավորմամբ ընթացքի մեջ են նաեւ Գիշի, Վաղուհաս գյուղերի նոր դպրոցների կառուցման աշխատանքները, Շուշիում վերակառուցվում է Խ. Աբովյանի անվան դպրոցը, կառուցվում է Մարտունու հիվանդանոցը եւ այլն։