Շվեյցարիայի խորհրդարանում ցուցադրվել է "Աղետ. Մի ցեղասպանություն" ֆիլմը

Շվեյցարիայի խորհրդարանում ապրիլի 13-ին հայ-շվեյցարական բարեկամության խորհրդարանական խմբի եւ «Վտանգված ժողովուրդների ընկերակցություն» (Gesellschaft für bedrohte Völker) կազմակերպության նախաձեռնությամբ Բեռնի արվեստի թանգարանի կինոդահլիճում ցուցադրվել է գերմանացի ռեժիսոր Էրիկ Ֆրիդլերի (Eric Friedler) նկարահանած «Աղետ. Մի ցեղասպանություն» վավերագրական ֆիլմը:

90 րոպեանոց ֆիլմի ցուցադրությանը հաջորդել են քննարկումներ` կինոռեժիսոր Էրիկ Ֆրիդլերի եւ Դողան Ախանլիի մասնակցությամբ: Գերմանիայում բնակվող թուրք գրողը Հայոց ցեղասպանության վերաբերյալ «Վերջին դատարանի դատավորները» (Dogan Akhanli, die Richter des Jüngsten Gerichts) գրքի հեղինակն է:

«Աղետ» ֆիլմը նկարահանվել է Հայոց ցեղասպանության ականատեսների, Թուրքիայում ամերիկացի եւ եվրոպացի դիվանագետների (այդ թվում` Օսմանյան կայսրությունում ԱՄՆ դեսպան Մորգենթաուի, Գերմանիայի դեսպան Մետտեռնիխի եւ այլոց), ինչպես նաեւ հումանիտար առաքելություններով այնտեղ գտնվածների հիշողությունների հիման վրա: Ֆիլմի կցուցադրվի նաեւ հեռուստատեսությամբ. տեղեկացնում է ՀՀ ԱԳՆ մամուլի եւ տեղեկատվության վարչությունը: