Հայաստանին վերաբերող նոր փաստաթուղթ՝ WikiLeaks-ից

Անգլիական «Գարդիան» պարբերականը WikiLeaks-ի նոր փաստաթուղթ է հրապարակել, որը վերաբերվում է 2003 թ. Հայաստանից Իրան տեղափոխված զինամթերքին: «Գաղտնի» որակված փաստաթղթի հեղինակը՝ Հայաստանում ԱՄՆ դեսպան Մարի Յովանովիչն է:

Փաստաթղթում նշվել է, որ հունվարի 14-ին երկու առանձին հանդիպումներ են տեղի ունեցել՝ Սերժ Սարգսյանի և Ազգային անվտանգության ծառայության ղեկավար Գորիկ Հակոբյանի հետ: Մարի Յովանովիչի «գաղտնի» նամակում մանրամասներ կան այդ երկու հանդիպումներից: «Սերժ Սարգսյանը խոստովանեց Բուլղարիայից զենքի ձեռք բերումը, և ոչ Սարգսյանը, ոչ էլ Գորիկ Հակոբյանը չվիճարկեցին մեր տեղեկություններն այն մասին, թե զենքը հետագայում տեղափոխվել է Իրան-Իրաք: Երկուսն էլ նշեցին, որ հետաքննությամբ կպարզեն, թե ինչպես է զենքը Հայաստանից տեղափոխվել Իրան-Իրաք»: