Իսրայելը հարվածներ է հասցրել Սիրիային ու Լիբանանին

Իսրայելական օդուժը հարվածել է Սիրիայի Լաթաքիայի նահանգում գտնվող սիրիական բանակի դիրքերի ուղղությամբ։ Այս մասին հայտնում է Syria TV-ին։

Վեց ավիահարվածի թիրախ է դարձել Սպիտակ նավահանգստի շրջակայքը և 110-րդ ռազմածովային բրիգադը, որտեղ ռազմանավեր և զենքի պահեստներ կան։ Հարվածների հետևանքով վիրավորներ են գրանցվել սիրիական բանակի զինծառայողների շրջանում։

Իսկ Al Jazeera-ի տեղեկացմամբ՝ Լիբանանի առողջապահության նախարարությունը հայտնել է, որ իսրայելական անօդաչու թռչող սարքը Սուր շրջանի Մաարուբ քաղաքում թիրախավորել է մի մեքենա, որի պայթյունի հետևանքով մեկ մարդ է զոհվել։ 

Նախորդ շաբաթվանից Իսրայելը սաստկացրել է հարձակումները Լիբանանի վրա այն բանից հետո, երբ պնդել է, որ իր հյուսիսային բնակավայրերից մեկը Լիբանանի կողմից հրթիռային հարձակման է ենթարկվել: «Հեզբոլլահ»-ն իր հերթին հերքել է իր մասնակցությունը հարձակմանը: