Չինաստանն իր բողոքն է հայտնել ԱՄՆ-ին՝ Իրանի հետ համագործակցության համար պատժամիջոցների պատճառով

Պեկինը խստորեն դատապարտում է Վաշինգտոնին՝ կապված Իրանի հետ համագործակցության համար Չինաստանի որոշ ընկերությունների և անհատների նկատմամբ ԱՄՆ-ի կողմից սահմանված պատժամիջոցների հետ։ Այս մասին այսօր՝ հունիսի 12-ին, հայտնում է ՏԱՍՍ-ը՝ հղում անելով Չինաստանի առևտրի նախարարության հայտարարությանը։

«Իրանի հետ փոխգործակցության պատրվակով ԱՄՆ-ն ՉԺՀ-ի որոշ ձեռնարկությունների և անհատների ներառել է, այսպես կոչված, հատուկ թիրախավորված քաղաքացիների ցուցակում՝ կիրառելով նրանց նկատմամբ պատժամիջոցներ։ Չինաստանը խստորեն քննադատում է դա»,- ասվում է փաստաթղթում։

«Միացյալ Նահանգները պետք է դադարեցնի իր անխոհեմ ճնշումը։ ՉԺՀ-ն կձեռնարկի անհրաժեշտ միջոցներ, մենք վճռականորեն կպաշտպանենք չինական ձեռնարկությունների և անհատների օրինական շահերը»,- շարունակվում է փաստաթղթում։

Ավելի վաղ ԱՄՆ ֆինանսների նախարարությունը Իրանի վերաբերյալ պատժամիջոցների ցուցակում ներառել էր յոթ ֆիզիկական անձանց և վեց ընկերությունների։ Ցուցակում ներառված են Չինաստանի քաղաքացիներ և ձեռնարկություններ, որոնք իբր Իրանին ցենտրիֆուգներ և էլեկտրոնիկա են վաճառել: Սա նշանակում է ԱՄՆ-ում ակտիվների սառեցում և ԱՄՆ քաղաքացիների և բիզնեսի հետ բիզնես վարելու արգելք: