Հետախուզությունը մտացածին է համարում ռուսների ունեցած կոմպրոմատի մասին լուրերը

ԱՄՆ նորընտիր նախագահ Դոնալդ Թրամփը հայտարարել է, որ ԱՄՆ Ազգային հետախուզությունն ուսումնասիրել է լրատվամիջոցներում հրապարակված զեկույցն այն մասին, որ Ռուսաստանն իբր թե կոմպրոմատ ունի իր դեմ, եւ շարադրված տեղեկությունները հորինվածք է անվանել։

Թրամփը պնդում է, որ այդ մասին իրեն հեռախոսով հայտնել է ԱՄՆ Ազգային հետախուզության ղեկավար Ջեյմս Քլեփերը։ Թրամփի խոսքով՝ Քլեփերը սկանդալային զեկույցն անվանել է «կեղծ եւ մտացածին»։

Ավելի վաղ Քլեփերը հայտնել էր, որ այդ թեման քննարկել է Թրամփի հետ, սակայն նրա հայտարարությունում այդքան կտրուկ արտահայտություններ չէին եղել, փոխանցում է BBC–ն։

Քլեփերի հայտարարության մեջ ասվում էր, որ ինքը կասկածում է, թե հետախուզական ծառայությունները կապ են ունեցել զեկույցի պատրաստման հետ։