ԻՊ-ն առանց պետական աջակցության նման հարձակում չի կարող իրականացնել. Դեմիրթաշ

«Իսլամական պետությունը» չի կարող հարձակումներ իրականացնել առանց պետության աջակցության. կարծիք է հայտնել Թուրքիայում քրդամետ Ժողովուրդների դեմոկրատական կուսակցության առաջնորդ Սելահաթթին Դեմիրթաշը CNN International-ի եթերում:

Ըստ Demokrathaber-ի` Դեմիրթաշի խոսքով՝ վերջին ամիսների ընթացքում Թուրքիայում բազում հարձակումներ են տեղի ունեցել, և կան ապացույցներ, որ դրանցից շատերն իրականացվել են «Իսլամական պետության» կողմից:

«Այնուամենայնիվ, կարծում ենք, որ «Իսլամական պետության»-ը աջակցողներ կան»,- ասել է նա:

Հարցին, թե` պետությա՞նն եք համարում հարձակումների պատասխանատուն, Դեմիրթաշը պատասխանել է. «Իհարկե, նրանք են պատասխանատու: ԻՊ-ի դեմ ազդեցիկ պայքար չմղեցին: Աչք փակեցին, որ ԻՊ-ն ավելի մեծանա: Իմանալով, որ ԻՊ-ի առաջնորդներ կան Թուրքիայում, նրանց ձերբակալելու ուղղությամբ ոչինչ չի արվել: Անկարան ոչինչ չի ձեռնարկում, թեև այնտեղ է գտնվում Ազգային հետախուզության վարչությունը»: