«Գրեմմի»-ի արժանանալն իմ` մարդ լինելս չի փոխել. Արտո Թունջբոյաջյան

Այսօր «Լոֆթը» կազմակերպել էր հանդիպում երաժիշտ Արտո Թունջբոյաջյանի հետ:

Նա նշեց, որ կյանքում ամենակարևորը համբերությունն ու ինքնավստահությունն է. եթե վստահ ես ինքդ քեզ վրա, կարող ես շատ բաների հասնել և հեռուն գնալ: Թունջբոյաջյանը համոզված է` յուրաքանչյուր մարդ ինքնին յուրահատուկ է, և կյանքում պետք է անի ամեն ինչ, որպեսզի չկորցնի իր դեմքը:

«Ինձ ներկայացնելիս միշտ ասում են` «Գրեմմի» է ստացել: Կուզեմ ասել, որ իմ` մարդ լինելը «Գրեմմի»-ն չի փոխել կամ` որևէ այլ մրցանակ: Մրցանակները, հասկանում եմ, որ գործդ հարգելով են տալիս, սակայն ինձ համար մրցանակ շահելու գլխավոր իմաստն այն է, որ դու հասել ես այդ մակարդակին»,- ասաց երաժիշտը: