Հայրիկյանի դեմ մահափորձը Ռուսաստանի հետ կապելու փորձն անհաջող է. ռուս փորձագետ

Հայրիկյանի հրապարակած տեսակետը` իր մահափորձի վերաբերյալ, ինչ-որ չափով արտահայտում է այն ինֆորմացիոն միտումները, որ կան Հայաստանում. այսօր կայացած Երեւան-Մոսկվա հեռուստակամրջի ժամանակ կարծիք հայտնեց Սեւծովյան-Կասպյան տարածաշրջանի քաղաքական եւ սոցիալական հետազոտությունների ինստիտուտի գիտաշխատող Անդրեյ Արեշեւը:

Նա, սակայն, ասաց, որ ինքը չի կարծում, թե նման կարծիքն իշխող է Հայաստանում, բայց նշեց, որ, այնուամենայնիվ, կա` Հայաստանի հասարակական-քաղաքական, սոցիալ-տնտեսական բնույթի բոլոր դժբախտությունները, բոլոր բացասական երեւույթները կապվում են Ռուսաստանի գործունեության հետ:

«Իհարկե, չգիտենք, թե ով է քաշել ատրճանակի ձգանը, բայց որ Հայրիկյանի դեմ մահափորձը այս կամ այն կերպ Ռուսաստանի կամ ռուսական քաղաքականության հետ կապելու փորձ է արվում, ինձ թվում է, որ այդ գիծը բավականին անարդյունավետ է: Որովհետեւ Հայաստանում հասարակական կարծիքի դրսեւորումներում, որ բավականին կոնսոլիդացված են այս հարցում, չկան միջադեպը Ռուսաստանի հետ կապելու միտումներ»,- ասաց Անդրեյ Արեշեւը:

Իսկ Ռուսատանի անունը շահարկելը, նրա կարծիքով, ընտրությունների նախաշեմին Հայաստանի հասարակական կարծիքի վրա ազդելու միջոց է` քաղաքական ծայրահեղականության եւ տեռորիզմի միջոցով: