ԵՊՀ դասախոսն ազատվեց աշխատանքից ուսանողի հետ 40 հազար դրամի գործարք կապելու «ճանապարհին»

Երեկ համացանցում է հայտնվել ԵՊՀ կենսաբանության ֆակուլտետի անալիտիկ քիմիայի դասախոս Նունե Գյոկչյանի զրույցը ուսանողներից մեկի հետ: Ձայնագրության մեջ հստակ լսվում է` Գյոկչյանը 40 000 դրամ է պահանջում ուսանողներից հավելյալ պարապմունքների, քննություն և ստուգարք ստանալու համար, ինչպես նաև խորհուրդ տալիս նաեւ օգտվել մաթեմատիկայի դասախոսի «ծառայություններից»:

Yerkir.am-ի հետ զրույցում ԵՊՀ հասարակայնության հետ կապերի եւ լրատվության վարչության պետ Կարեն Գրիգորյանը հայտնեց, որ Գյոկչյանն այսօր ազատվել է աշխատանքից:

Հարցին, թե ծառայողական քննություն տարվո՞ւմ է` ճշտելու համար ձայնագրության մեջ ակնարկվող` մաթեմատիկայի դասախոսի կոռուպցիոն գործողությունները, Գրիգորյանը պատասխանեց, որ քննություն տարվում է, և եթե պարզվի, որ նա նույնպես կոռուպցիայով է զբաղվում, կազատվի աշխատանքից:

«Հակակոռուպցիոն պայքարը մեզ մոտ լուրջ հիմքի վրա է դրված, ձայնագրությունները մեզ շատ են օգնում, բայց միայն դա չէ, որ մեզ պետք է ստիպի որոշակի քայլեր անելու»,-ասաց Գրիգորյանը: