Տրիպոլին բանակցում է Սարկոզիի հետ

Մուամար Քադաֆիի որդին` Սեիֆ ալ Իսլամը հայտարարել է, որ իր հոր վարչակազմը բանակցություններ է վարում Ֆրանսիայի ղեկավարության հետ. տեղեկացնում է Reuters-ը `վկայակոչելով ալժիրյան El Khabar թերթը:

«Մենք բանակցում ենք Ֆրանսիայի, այլ ոչ թե ապստամբների հետ»,- ասել է Քադաֆի-կրտսերը` հավելելով, որ լիբիացի պատվիրակը հանդիպել է Ֆրանսիայի նախագահ Նիկոլա Սարկոզիի հետ, եւ վերջինս հաստատել է, որ Լիբիայի Ազգային խորհուրդը, այսինքն` ապստամբները «չեն կարող գոյություն ունենալ առանց ֆրանսիական զենքի, փողերի ու այլ օժանդակության»:

Ըստ Սեիֆ ալ Իսլամի` ֆրանսիական կողմը հայտարարել է, թե Քադաֆիի հետ համաձայնության գալուց հետո Ֆրանսիան կստիպի Խորհրդին դադարեցնել կրակը:

Պաշտոնական Փարիզն այդ տեղեկությանը դեռ չի արձագանքել: