ՌԴ-ից ՀՀ գազամատակարարումն իրականացվում է բնականոն ռեժիմով. «Գազպրոմ Արմենիա»

ՌԴ–ից Հայաստան գազամատակարարումն իրականացվում է բնականոն ռեժիմով։ Sputnik Արմենիային այս մասին հայտնել են «Գազպրոմ Արմենիա» ընկերությունից։

Ավելի վաղ «Հրապարակ» թերթը, հղում անելով ռուսական աղբյուրներին, հայտնել էր, որ Ռուսաստանը նախատեսում է նոյեմբերի 1-ից դադարեցնել Հայաստանի գազամատակարարումը։

«Ռուսաստանից Հայաստան բնական գազի մատակարարումներն իրականացվում են սովորական ռեժիմով», - հայտնել են ընկերության մամուլի ծառայությունից:

Հիշեցնենք` ռուսական գազի պայմանագրային գինը Հայաստանի սահմանին 2019 թվականից պաշտոնապես հաստատված է 165 ԱՄՆ դոլար՝ 1000 խորանարդ մետրի դիմաց։ Բայց ՀՀ–ՌԴ միջկառավարական պայմանագրի համաձայն՝ եթե Հայաստան մտնող գազի փաստացի կալորիականությունը (ստորին այրման ջերմությունը) ավելի բարձր է ստանդարտ հաշվարկային հիմքից, գինը համամասնորեն վերահաշվարկվում է։ Այս հիմքով ՌԴ–ից ներկրվող գազի բազային արժեքն այսօր կազմում է 177.53 դոլար, բայց ՀՀ սպառողների համար վերջնական սակագինը մնում է անփոփոխ՝ շնորհիվ էներգետիկ համակարգում ներքին վերաբաշխումների և կառավարության փոխհատուցումների։